واقع ف تالته ابتدائى

عركه
وأحمد عبد المقصود مات
واللى شايف
جتته بكُترها مساعداه
يجينى
وأنا حأفصلّها على مقاسه
بمطوه
او موس من سقف حنكى
مش حتفرق كتير
وسعيد
اللى قاعدلكو فى تالته ثانوى ازهرى
للسنه التالته
حيبطَّل قِراية شِعر
ومواعدة بنات
ومش حيكتب حرف واحد
ف كراسة الاجابه
الا لما تغيَّروا
اسئلتكو دى
والاجابه تكون بالقلم الرصاص
وأسئلوهم
فى تالته ابتدائى
أنا كنت عامل ايه
ودكاترة تالته كليه
قالولهم
قطَّعت كام ورقه اجابه
وسِبتها ومشيت
عركه ودم
وأحمد عبد المقصود مات
وف نيتى
ارجع لتالته ابتدائى
من تانى
أرن جرس الفُسْحه
اخد حقى
من لِعب ما لعبتوش
أخد حقى
من حواديت سكنتنى
وما طِلعتش منها لدلوقت
بعد اصحابى
ماسابوها مع اول عفريت
طلع ف الحدوته
كفايه عليا تالته ابتدائى
واحمد عبد المقصود
بيجيبلى المريله الجديده
والجزمه الكاوتش من باتا
كفايه عليا تالته ابتدائى
وأخر منايا..
أسمعه بيسألنى
بعد ما يدينى المصروف
حتعمل بيه ايه
وأقوله وأنا مدلدل رقبتى
وعِينى بتبصله
حأشترى حاجه حلوه..

فاردين جتتهم م السما للبحر
تكونوش ف عز الحرب
ورافضين المعاهده
وانا اللى ع الفرح موزوز
مش ناقصه غير خبطتين ع الباب
والصُبح يدخل علينا
وهوا كاره
دخلته بدرى
ايه الحكايه
تكونش نعارة الغاره ع الصبح منقاده
والكل داخل ف جرى
من البيوت ع الريق
وموت حقيقى ف الشوارع
وقت المسا ينعاز
وانا اللى فارش بالعياط ع البحر
بحُبى الموده
وكرهى ترتيب المقابلات السعيده
والباقى ف كسوفى من خلق الله
وناوى
بالغُنى أحارب الكفار
اتلموا ...اتلموا
ع الرمله قيموا النور
وف زفة المتاعيس
ابريق
يخُر عريس
وايه تاخد الريح م السواد
...................
ضلّمت
وكانلى عشم ف السواقه ف نور
وزى واحد
ملهش قسمة فرْح ف التواريخ
بيطلعونى من فرحتى
ويرمونى ف أخر عياطى
رمية صحابى
وسط جيش من الكفار
واتلموا اتلمواااا
أنا لسه متفاجأ
برقصتى الفردى
والمنشدين فردى
وهما بيطلعوا فردى
اتلموا
يكونشى خبط الدفوف
بيلمهم فردى
ويجعل مسا المحبين
للعمار صبّاحى
........
وبيطلعوا م الشوارع
سايبين نواصيها
بالطشوت والحلل
وأنصاص قوالب طوب
ونكستين
على اللى طالها ولا حدفش
من جيش لجيش
والعمر عدى بجد
وانا كنت ناوى ماجيش
لولا حدفنى المد
وأنا اللى
اتلموا .؟..اتلمو
تكونشى نية غُنايا
بوظتلى الحال
وانا اللى
م الفرح مكسوف
وهمّا
جتتْ.جتتْ
فى كل حته
جتت..حتت
وانا اللى
بكل ما فيّا
ومش طالعلى حسْ
...........
ما تعيطيش
دلوقتى محتاج
لضحك وغُنا
وانا اللى
هجرتنى اغانى
تشبه صوتها ده بالذات
محتاج لضحك
وابقى فى ضهرى عيطى
اتلموا.. اتلموا
عيال
وبتجرب عمرها ف البوس
وبترمى هيجانها
ف حبة ورق
مابيوصلوش لحد
طالعين ف وش الصبح
والشنطه مليانه
وبيرجعوا للصبح
بمحبه ع الاخر
مع ان طلوعهم
من جيش النكسه
كان اكبر ظلم
وانا اللى بالم فيهم
جتت..جتت
يتلموا يتلموا
وانا اللى
بوظان غُنايا ونيتى وحالى
مرسومه بالالوان
وانا اللى
واقع ف أكبر ظُلم ف اللوحه
وبيطلعوا م الجيش
لاقرب قهوه ع الناصيه
وبيلعبوا كوتشينه بالمقلوب
الولد شايب
والبنت ملهاش ف الرهان
..................
وبيطلع من أخر دُفعه
ف جيش النكسه
لجيش تانى
ف اوضه على ناصية حاره
هو وكل النياشين
ووسام الشجاعه
وبندقيه فاضيه على البدله الميرى
ام خمسه وعشرين طلقه
من راسه
لما لاخر روح ف عنيه
ف لوحه ابيض واسود
على حيطه
ونس رطوبتها
أكل اسم اللى رسمها
وأنا
وف عز رفضى المعاهده
واقع ف اكبر ظلم ف اللوحتين.

كل سنه واحنا

كل سنه واحنا زى ما احنا

على قد احلامنا

حنخلى بكره جميل

يشبه ملامحنا

للوجع الجميل

بمجرد

ماألمح ف عيون الناس أحلام أتشائم

بمجرد

ماألمح ف عنيه النوم أخاف

شوف

ف السنه التلتميه خمسه وستين يوم

الف نومه بخمسميت حلم

بكذا طريقه للموت

ف السنه التلتميه خمسه وستين يوم

مليون شقا

مليار قلق

الا لحظه وحيده للحلم الجميل

يرتاح ما بين ايدى

ما ينخضش

ولا يرتعش

بينام ويحلم

انه حلم جميل

مشهد

الساقيه دارت خرت

دم ع الجرنال

سحبت اخر نفس

م البص ع العناوين

زفة الحناطير نفسى أشوفها

ماسكه ف جدار أوضتى

معلقه الحدوه والشخاليل

حجاب الشيخ ما ينسابشى

أبويا ف أول الحاره

مستنى النحش ياخد الدوران

علب السجاير

فرقها ع المعازيم

ووقت الدُخله ودعهم جميعاً

الا أنا...أنا زعلان

ربع جنيه مخروم

ببساطه كده
أصله كان بيفرقع
ف ألاربع جنيهات المخرومه
ويسدد ديون المديونين
ببساطه كده
أصله كان
لمّ الجعانين
وعملهم عزومه
ع المزاج والطلب
ببساطه كده
لم كل الاحبه
عملهم بيوت بضل ونخيل
ببساطه
كتروا الجعانين
زادوا المحتاجين
ببساطه كده
طلعهم برّاه
قفل حلمه عليه ونام.

قصــــــــــــــــــــــايد

سفــــــر
طير مطرود من رحمة طير
وورده وحيد ف ارض شوك
وشجر مسكون بأحزانك
وحزن سكن ناس
وناس ساكناك بالعشم
وحاجات ماهيش منك
ألا قوللى...
مين مشاك
عريان ف الشارع

حرب

ولد
ما بيحبش من الكوتشينه
غير البنت
وهوا بيكره الشايب
بيبص ف عنيها
يخطفها م البرواز....؟

زياد سعيد

ياااااه
ابنك بيكبر اوى اوى
بعد مناقشه
لا بد تكون خسران فيها
...
الواد كبر
جايبلك ف ايده
صورة اول بنت

حطت اول حرف من اسمه على صدرها